രണ്ടു കോടി രൂപയുടെ ഭരണാനുമതി ലഭിച്ചതോടെ കുന്നുംഭാഗം ഗവൺമെന്റ് ഹൈസ്കൂളില് നിര്മിക്കുന്ന പുതിയ അക്കഡേമിക് ബ്ലോക്കിന്റെ രണ്ടാംഘട്ട നിര്മാണം ഉടൻ ആരംഭിക്കും. നേരത്തെ എംഎല്എ ഫണ്ടില് നിന്ന് അനുവദിച്ച ഒരു കോടി രൂപയ്ക്ക് ഒന്നാം ഘട്ട നിര്മാണ പ്രവര്ത്തനങ്ങള് പൂര്ത്തിയാക്കിയിരുന്നു .
ഏഴായിരം ചതുരശ്ര അടിയുള്ള കെട്ടിടത്തിന്റെ സ്ട്രക്ചര് വര്ക്കുകളും ക്ലാസ് മുറികള് തിരിച്ചുള്ള ജോലികളുമാണ് പൂര്ത്തിയായത്. കെട്ടിടത്തില് എട്ട് ക്ലാസ് മുറികളാണുള്ളത്. കെട്ടിടത്തിന്റെ മുഴുവന് പണികളും 2020 ഓടെ പൂര്ത്തിയാക്കാനാണ് ലക്ഷ്യമിടുന്നത്. മൂന്ന് നിലകളിലായിട്ടാണ് അക്കഡേമിക് ബ്ലോക്ക് നിര്മിക്കുന്നത്. നിലവിലെ ഹൈസ്കൂള് കെട്ടിടത്തിനുള്ള ക്ലാസ് മുറികളുടെ നിര്മാണം മാത്രമാണ് ഇപ്പോള് നടക്കുന്നത്. സ്പോര്ട്സ് സ്കൂളിനും മറ്റുമായി ബാക്കിയുള്ള നിലകള് പിന്നീട് ഫണ്ട് അനുവദിക്കുന്നതിനനുസ രിച്ച് പൂര്ത്തിയാക്കാണ് പദ്ധതി. അഞ്ചു മുതല് 12 വരെ ക്ലാസുകളിലെ കുട്ടികള്ക്കായി 14 ക്ലാസ് മുറികള്, ഓഫീസ്, സ്റ്റാഫ് മുറികള്, ലാബുകള്, മള്ട്ടിമീഡിയ റൂം, ലൈബ്രറി, റീഡിംഗ് റൂം എന്നിവ ഉള്പ്പെടുന്നതാണ് അക്കഡേമിക് ബ്ലോക്ക്.
രണ്ടാംഘട്ട നിര്മാണ പ്രവര്ത്തനങ്ങള് പൂര്ത്തിയാക്കി പഴയ സ്കൂള് കെട്ടിടത്തില് നിന്നും മാറുന്നതോടെ സ്പോര്ട്സ് സ്കൂള് കെട്ടിടത്തിന്റെ നിര്മാണവും ആരംഭിക്കാനാകുമെന്നാണ് പ്രതീക്ഷ. ഗ്രൗണ്ടുകളും കോര്ട്ടുകളും സ്ഥാപിക്കുന്നതിനായി നിലവില് പഴയ സ്കൂള് കെട്ടിടം ഇരിക്കുന്ന സ്ഥലം കൂടി ആവശ്യമാണ്. അതിനാല് പുതിയ കെട്ടിടം നിര്മാണം പൂര്ത്തിയാക്കി സ്കൂളിന്റെ പ്രവര്ത്തനം മാറ്റിയാല് മാത്രമേ സ്പോര്ട്സ് സ്കൂളിന്റെ നിര്മാണവും ആരംഭിക്കാനാകൂ. വര്ഷങ്ങള്ക്ക് മുന്പേ പ്രഖ്യാപിച്ച സ്പോര്ട്സ് സ്കൂള് യാഥാർഥ്യമാവുകയാണെങ്കി ല് മേഖലയില് വളര്ന്നുവരുന്ന നിരവധി കായിക താരങ്ങള്ക്കും പ്രയോജനകരമാകും.