എരുമേലി: ചക്ക കൊണ്ട് ഇതുവരെ കണ്ടിട്ടില്ലാത്ത രുചിയൂറുന്ന വിഭവങ്ങൾ ഒരുക്കുന്ന ചക്ക മഹോത്സവം മേയ് ഒന്നിന് പഴയകൊരട്ടിയിൽ. മതിയാവോളം ചക്കയുടെ മാഹാത്മ്യം കണ്ടും രുചിച്ചും അറിയുക മാത്രമല്ല വ്യത്യസ്തങ്ങളായ ചക്കയുടെ രുചിക്കൂട്ടുകൾ പാകം ചെയ്യാനുളള പാചക പരിശീലനവും സംഘടിപ്പിച്ചിട്ടുണ്ട്.
പഴയകൊരട്ടി സെന്റ് മേരീസ് പള്ളി പാരിഷ് ഹാളിൽ രാവിലെ 11 മുതലാണ് മാതൃവേദി- യുവജന സംഘടനകൾ സംയുക്തമായി ചക്ക മഹോത്സവം 2018 സംഘടിപ്പിച്ചിരിക്കുന്നത്. ചക്കയുടെ വിവിധയിനം മൂല്യ വർധിത ഉത്പ്പന്നങ്ങളുടെ പ്രദർശനവും വിപണനവുമുണ്ട്.
ഉത്ഘാടനം എരുമേലി മഹല്ലാ മുസ്ലിം ജമാഅത്ത് ചീഫ് ഇമാം ഹാജി ടി.എസ്. അബ്ദുൽ കെരീം മൗലവി നിർവഹിക്കും. സെന്റ് മേരീസ് പള്ളി വികാരി ഫാ. സെബാസ്റ്റ്യൻ വെച്ചൂക്കരോട്ട് അധ്യക്ഷത വഹിക്കും. ജില്ലാ പഞ്ചായത്തംഗം മാഗി ജോസഫ് മുഖ്യ പ്രഭാഷണം നടത്തും.