കാഞ്ഞിരപ്പള്ളി: കാരുണ്യ സ്പര്‍ശമായി പെരുവന്താനം സെന്‍റ് ആന്‍റണീസ് കോളജ്. കാഞ്ഞിരപ്പള്ളി- കാഞ്ഞിരംകവല റോഡുവികസനത്തെ തുടര്‍ന്ന് സ്വന്തമായുണ്ടായിരുന്ന കിടപ്പാടം നഷ്ടമായ ആനക്കല്ല് തീപ്പൊരിപ്പറമ്പില്‍ തങ്കപ്പന്‍ പടുത കെട്ടി നാലു മക്കളുമായി റോഡരുകിലാണ് താമസിച്ചിരുന്ന്.
ഇപ്പോൾ ഇവർ ഒരു സുന്ദര ഭവനത്തിലേക്ക് ഗൃഹപ്രവേശം നടത്തുകയാണ്. തങ്കപ്പന്‍റെ ജീവിത പശ്ചാത്തലം മനസിലാക്കിയ സെന്‍റ് ആന്‍റണീസ് കോളജ് ഡെപ്യൂട്ടി ഡയറക്ടറായി പ്രവര്‍ത്തിച്ചുവരുന്ന തങ്കച്ചന്‍ കുര്യന്‍ സ്‌നേഹഭവനം നിർമിച്ചുനല്‍കുന്നതോടൊപ്പം ഏറ്റുമാനൂര്‍ കാണക്കാരിയില്‍ സോമന്‍ ഇലവന്താനത്തിനും വീട് ഒരുക്കി കഴിഞ്ഞു. കാണക്കാരിയിലെ ഭവനത്തിന്‍റെ താക്കോല്‍ ദാനം 31 ന് മോന്‍സ് ജോസഫ്എംഎൽഎ നിര്‍വഹിക്കും. കോളജ് ഡയറക്ടര്‍ റവ. ഡോ. ആന്‍റണി നിരപ്പേല്‍, ഡെപ്യൂട്ടി ഡയറക്ടര്‍ തങ്കച്ചന്‍ കുര്യന്‍, കാണക്കാരി പഞ്ചായത്ത് പ്രസിഡന്റ് ചെറിയാന്‍ മാത്യു, ഹോണററി സെക്രട്ടറി ഡോ. ലാലിച്ചന്‍ കല്ലംപള്ളി, പിആര്‍ഒ ജോസ് ആന്‍റണി, പ്രിന്‍സിപ്പല്‍ പ്രഫ. ബാബു ജോസഫ് തുടങ്ങിയവര്‍ പങ്കെടുക്കും. 
ആനക്കല്ലിലെ ഭവനത്തിന്‍റെ താക്കോല്‍ ദാനം ജനുവരി 20 ന് വൈകുന്നേരം ഡോ. എന്‍. ജയരാജ് എംഎൽഎ നിര്‍വഹിക്കും. സെന്‍റ് ആന്‍റണീസ് എഡ്യൂക്കേഷണല്‍ ആൻഡ് ചാരിറ്റബിള്‍ സൊസൈറ്റിയുടെ ജൂബിലി സ്മാരകമായി ഭവന രഹിതരായ നാലു വിദ്യാർഥികള്‍ക്ക് വീടുകള്‍ നിര്‍മിച്ചു നല്‍കിയിരുന്നു.
