മുണ്ടക്കയം: പൂഞ്ഞാർ നിയോജക മണ്ഡലത്തിലെ അഞ്ചു പട്ടികജാതി കോളനികളെ സംസ്ഥാന പട്ടികജാതി വികസന വകുപ്പിന്റെ അംബേദ്കർ ഗ്രാമവികസന പദ്ധതിയിൽ ഉൾപ്പെടുത്തിയതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു.
മുണ്ടക്കയം പഞ്ചായത്തിലെ ആറാം വാർഡിൽപ്പെട്ട വണ്ടൻപതാൽ മൂന്ന് സെന്റ് കോളനി, പതിനേഴാം വാർഡിലെ ആഴംമല ഐഎച്ച്ഡിപി കോളനി, പതിനാറാം വാർഡിലെ താന്നിക്കപ്പതാൽ ഐഎച്ച്ഡിപി കോളനി, എരുമേലി പഞ്ചായത്ത് പതിമൂന്നാം വാർഡിൽപ്പെട്ട മൂക്കൻപെട്ടി ഐഎച്ച്ഡിപി കോളനി, കോരുത്തോട് പഞ്ചായത്ത് ഏഴാം വാർഡ് കുഴിമാവ് ഐഎച്ച്ഡിപി കോളനി എന്നിവിടങ്ങളിൽ പദ്ധതി നടപ്പിലാക്കും.
കോളനികൾക്കുള്ളിലെ റോഡ്, നടപ്പാത, ഡ്രെയിനേജ്, ഇന്റർനെറ്റ് സൗകര്യങ്ങൾ, കുടിവെള്ളത്തിനും ജലസേചനത്തിനുള്ള സൗകര്യങ്ങൾ, കോളനികളിലെ പൊതുസ്ഥലങ്ങളിലെയും വീടുകളിലെയും വൈദ്യുതീകരണം, സോളാർ തെരുവുവിളക്കുകൾ സ്ഥാപിക്കൽ, പൊതുസ്ഥലങ്ങളിലെയും വീടുകളിലെയും ഖര-ദ്രവ മാലിന്യ സംസ്കരണ സംവിധാനങ്ങൾ, ഭവന പുനരുദ്ധാരണം, പൊതു ആസ്തികളുടെ മെയിന്റനൻസ്, പൊതുവായ സൗകര്യങ്ങൾ മെച്ചപ്പെടുത്തൽ, സംരക്ഷണ ഭിത്തി നിർമാണം എന്നീ പ്രവർത്തനങ്ങളാണ് അംബേദ്കർ ഗ്രാമവികസന പദ്ധതിപ്രകാരം ഈ കോളനികളിൽ നടപ്പിലാക്കുന്നത്