മുണ്ടക്കയം: പൊതുപ്രവർത്തകർ നാടിന്‍റെ ആവശ്യങ്ങൾ കണ്ടറി ഞ്ഞു പ്രവർത്തിക്കുന്നവരാകണമെന്ന് മുൻ മുഖ്യമന്ത്രി ഉമ്മൻ ചാണ്ടി. മുണ്ടക്കയം പൗരാവലിയുടെ നേതൃത്വത്തിൽ പൊതു പ്രവർത്തന രംഗത്ത് പതിറ്റാണ്ടുകളായി നിറസാനിധ്യമായിരുന്ന മുൻ എംഎൽഎ കെ.വി. കുര്യന്‍റെ നവതി ആഘോഷ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. പകരംവയ്ക്കാനാവാത്ത രാഷ്ട്രീയ ജീവിത മാതൃകയാണ് കെ.വി. കുര്യൻ പാർട്ടിക്കും തന്‍റെ നാടിനും നൽകിയതെന്ന് ഉമ്മൻ ചാണ്ടി പറഞ്ഞു. 
കാഞ്ഞിരപ്പള്ളി രൂപതാധ്യക്ഷൻ മാർ മാത്യു അറയ്ക്കൽ അനുഗ്രഹ പ്രഭാഷണവും മുൻ മന്ത്രി പി.ജെ. ജോസഫ് മുഖ്യപ്രഭാഷണവും നിർവഹിച്ചു. മുണ്ടക്കയം പഞ്ചായത്ത് പ്രസിഡന്റ് കെ.എസ്. രാജു അധ്യക്ഷത വഹിച്ചു. കെപിസിസി സെക്രട്ടറി പി.എ. സലീം, ജോർജ് ജെ. മാത്യു, പ്രോഗ്രാം ജനറൽ കൺവീനർ സെബാസ്റ്റ്യൻ ചുള്ളിത്തറ, കോൺഗ്രസ് ബ്ലോക്ക് പ്രസിഡന്റ് റോയി കപ്പലുമാക്കൽ, സി.വി. അനിൽകുമാർ, സെബാസ്റ്റ്യൻ കുളത്തുങ്കൽ, മാഗി ജോസഫ്, ഒ.പി.എ. സലാം, ജോഷി ഫിലിപ്പ്, നൗഷാദ് ഇല്ലിക്കൽ, സി.കെ. കുഞ്ഞുബാവ, അസീസ് ബാഡിയിൽ, പി.പി. ജോഷി, ആർ.സി. നായർ, ജോർജുകുട്ടി ആഗസ്തി, സിജു കൈതമറ്റം എന്നിവർ പ്രസംഗിച്ചു. 
നവതി ആഘോഷിക്കുന്ന കെ.വി. കുര്യനെ മാർ മാത്യു അറയ്ക്കൽ പുരസ്കാരം നൽകിയും ഉമ്മൻ ചാണ്ടി ഷാൾ അണിയിച്ചും ആദരിച്ചു. വ്യാപാരി വ്യവസായി ഏകോപന സമിതിയുടെ പുരസ്കാരം പ്രസിഡന്റ് സി.കെ. കുഞ്ഞുബാവ നൽകി. വിവിധ രാഷ്ടീയ പ്രതിനിധികൾ, ത്രിതല പഞ്ചായത്ത് ജനപ്രതിനിധികൾ എന്നിവർ സന്നിഹിതരായിരുന്നു.
