പൊന്കുന്നം: പഴയ ടിക്കറ്റ് നല്കി കബളിപ്പിക്കാന് ശ്രമം നടത്തിയ കണ്ടക്ടർക്കെതിരേ കെഎസ്ആർടിസി വിജിലൻസ് വിഭാഗത്തിന് യാത്രക്കാരൻ പരാതി നൽകി. 27ന് ഉച്ചയ്ക്ക് 12ന് എരുമേലിയിലേക്കു പോകുന്ന കെഎസ്ആര്ടിസി ബസില് ഇരുപതാം മൈലില് നിന്നു പൊന്കുന്നത്തേക്ക് യാത്ര ചെയ്ത മാധ്യമ പ്രവര്ത്തകനെയാണ് കണ്ടക്ടര് കബളിപ്പിക്കാന് ശ്രമിച്ചത്.
പത്തു രൂപ കൊടുത്ത് എട്ടുരൂപയുടെ ബാക്കി ചോദിച്ചപ്പോള് കണ്ടക്ടര് ബാഗിനുള്ളില് തപ്പുന്നത് കണ്ട് പരിചയമുള്ള കണ്ടക്ടര് ആയതിനാല് ബാക്കി ഇപ്പം ഇല്ലായെങ്കില് നാളെ മതിയെന്നും പറഞ്ഞ് യാത്രക്കാരൻ കണ്ടക്ടറുടെ പിന്നിലായി സീറ്റില് ഇരുന്നു. കുറച്ചു കഴിഞ്ഞപ്പോള് ടിക്കറ്റും ബാക്കിയും തന്നു. എന്നാല് തന്റെ കൈയില് കിട്ടിയ മുഷിഞ്ഞ ടിക്കറ്റ് പരിശോധിച്ചപ്പോള് രാവിലെ ഒമ്പതിന് കുന്നുംഭാഗത്തു നിന്നു പൊന്കുന്നം ഭാഗത്തേക്ക് ഒരു യാത്രക്കാരന് നല്കിയ ടിക്കറ്റായിരുന്നു അതെന്ന് മനസിലായി.
പിന്നീടാണ് കണ്ടക്ടര് ബാഗില് തപ്പിയത് പഴയ ടിക്കറ്റായിരുന്നു എന്നു മനസിലായത്. ഉടന് തന്നെ യാത്രക്കാരൻ കാലാവധി കഴിഞ്ഞ ടിക്കറ്റിനെക്കുറിച്ച് ചോദിച്ചപ്പോള് നമ്പര് മാറി അടിച്ചപ്പോള് ലഭിച്ചതാണെന്നു പറഞ്ഞ് അപ്പോള് തന്നെ പഴയത് വാങ്ങി പുതിയ ടിക്കറ്റ് നല്കി കണ്ടക്ടര് തടിതപ്പി.