കാഞ്ഞിരപ്പള്ളി: ഡോ. എൻ. ജയരാജ് എംഎൽഎയുടെ ആസ്തി വികസന ഫണ്ടിൽ നിന്ന് അനുവദിച്ച 90 ലക്ഷം രൂപ വിനിയോഗിച്ച് പുനർ നിർമാണം നടത്തിയ കാഞ്ഞിരപ്പള്ളി ബസ് സ്റ്റാൻഡിന്റെ ഉദ്ഘാടനം 12 വൈകുന്നേരം നാലിനു നടക്കും. ഗതാഗത മന്ത്രി എ.കെ. ശശീന്ദ്രനാണ് സ്റ്റാൻഡ് ഉദ്ഘാടനം ചെയ്യുന്നത്. ഡോ. എൻ. ജയരാജ് എംഎൽഎ അധ്യക്ഷത വഹിക്കും.
ബസ് സ്റ്റാൻഡ് നവീകരണ പ്രവർത്തനങ്ങൾ അവസാന ഘട്ടത്തിലേക്ക് കടന്നു. 10നു മുന്പ് നിർമാണ പ്രവർത്തനങ്ങൾ പൂർത്തിയാക്കാനാണ് ലക്ഷ്യമിടുന്നത്. ഓട നിർമാണം, നിലം കോൺക്രീറ്റിംഗ്, പാതവീതികൂട്ടൽ എന്നീ നിർമാണ പ്രവർത്തനങ്ങളാണ് പൂർത്തിയായിരിക്കുന്നത്. കാത്തിരിപ്പ് കേന്ദ്രത്തിന്റെയും ഫുട് പാത്തിന്റെയും നിർമാണം പൂർത്തിയായി വരുന്നു. സ്റ്റാൻഡിലേക്ക് ബസ് കയറിവരുന്നതിന്റെ ബുദ്ധിമുട്ട് ഒഴിവാക്കുന്നതിനായി പഞ്ചായത്തിന്റെ കെട്ടിടം ഭാഗികമായി പൊളിച്ച് നീക്കിയിരുന്നു. ഈ ഭാഗത്ത് നടപ്പാതയും നിർമിച്ചു. ഇതോടൊപ്പം കോക്കാപ്പള്ളി റോഡിലേക്കുള്ള നടപ്പാതയും ടൈൽപാകി മനോഹരമാക്കും. ബസ് സ്റ്റാൻഡിൽ നിന്ന് പഞ്ചായത്ത് കിണറിനോടു ചേർന്ന് പുത്തനങ്ങാടി റോഡിലേക്ക് ഇറങ്ങുന്നതിനായി സ്റ്റെപ്പുകളും നിർമിക്കും. സ്റ്റാൻഡിനുള്ളിൽ ഹൈമാസ്റ്റ് ലൈറ്റുകളും സ്ഥാപിക്കുന്നുണ്ട്. മാർച്ച് ആറിനാണ് ബസ് സ്റ്റാൻഡ് നവീകരണം ആരംഭിച്ചത്.