ചിറക്കടവിലെ രാഷ്ട്രീയ സംഘർഷം അവസാനിപ്പിക്കാൻ സർക്കാർ അടിയന്തര നടപടി സ്വീകരിക്കണമെന്ന് ജില്ലാ കോണ്ഗ്രസ് കമ്മിറ്റി ആവശ്യപ്പെട്ടു. സിപിഎം, ബിജെപി സംഘർഷത്തെ തുടർന്ന് ആഴ്ചകളായി നിരോധനാജ്ഞ നിലനില്ക്കുന്നതു മൂലം ജനങ്ങൾ പൊറുതിമുട്ടുകയാണ്.
ദൈനംദിന ജീവിതം പോലും സ്തംഭിക്കുന്ന സാഹചര്യത്തിൽ സർക്കാർ നിഷ്ക്രിയത്വം അവസാനിപ്പിച്ച് സമാധാനം പുനഃസ്ഥാപിക്കുകയും നിരോധനാജ്ഞ പിൻവലിക്കുകയും ചെയ്യണം.ഈ ആവശ്യമുന്നയിച്ച് നാളെ ഉച്ചകഴിഞ്ഞ് നാലിനു കോണ്ഗ്രസ് ബ്ലോക്ക് കമ്മിറ്റിയുടെ നേതൃത്യത്തിൽ കാഞ്ഞിരപ്പള്ളി താലൂക്ക് ഓഫീസിനു മുന്പിൽ സമാധാന സംരക്ഷണ യോഗം സംഘടിപ്പിക്കും.
മുൻ മുഖ്യമന്ത്രി ഉമ്മൻ ചാണ്ടി എംഎൽഎ ഉദ്ഘാടനം ചെയ്യും. ജനപ്രതിനിധികൾ, രാഷ്ട്രീയ സാമൂഹിക സാംസ്കാരിക നേതാക്കൾ തുടങ്ങിയവർ പങ്കെടുക്കും. ജില്ലാ കോണ്ഗ്രസ് നേതൃയോഗത്തിൽ ഡിസിസി പ്രസിഡന്റ് ജോഷി ഫിലിപ്പ് അധ്യക്ഷത വഹിച്ചു. കുര്യൻ ജോയി, ടോമി കല്ലാനി, പി.എ. സലീം, ഫിലിപ്പ് ജോസഫ്, പി.എസ്. രഘുറാം തുടങ്ങിയവർ പ്രസംഗിച്ചു