നിയന്ത്രണംവിട്ട കാർ റേഷൻ കടയിലേക്ക് ഇടിച്ചു കയറി ഒരാൾക്കു പരിക്ക്. ഇന്നലെ രാവിലെ മുക്കൂട്ടുതറ ടൗണിൽ ചെറുപുഷ്പം ആശുപത്രിക്കു സമീപം വെൺകുറിഞ്ഞി സർവീസ് സഹകരണ ബാങ്ക് കെട്ടിടത്തിൽ കെ.എ. ആന്റണിയുടെ റേഷൻ കടയിലാണ് അപകടം. റേഷൻ സാധനങ്ങൾ വാങ്ങാനെത്തിയ വെൺകുറിഞ്ഞി തോപ്പിൽ ജോൺ മാത്യു (66) വിനാണ് പരിക്കേറ്റത്. കാലിൽ സാരമായി പരിക്കേറ്റ ഇദ്ദേഹത്തെ മുക്കൂട്ടുതറ അസീസി ആശുപത്രിയിൽ പ്രവേശിപ്പിച്ചു. കടയിലേക്കു കാർ പാഞ്ഞുവരുന്നതു കണ്ടു റേഷൻ കട ഉടമ ഉൾപ്പെടെ കടയിലുണ്ടായിരുന്നവർ ഓടി മാറിയതുമൂലം വലിയ അപകടം ഒഴിവായി.