കൊല്ലം-തേനി ദേശീയപാതയിൽ പൊൻകുന്നം 20-ാം മൈലിന് സമീപം ലോറി മറിഞ്ഞു. തമിഴ്നാട്ടിൽ നിന്നും ആലപ്പുഴയ്ക്ക് കയറുമായി പോയ ലോറിയാണ് അപകടത്തിൽ പെട്ടത്. അപകടത്തെ തുടർന്ന് ദേശീയപാതയിൽ അല്പനേരം ഗതാഗതം തടസപ്പെട്ടു.
ഇന്നലെ രാവിലെ 11.30 ഓടെയായിരുന്നു അപകടം. ഡ്രൈവർ ഉറങ്ങിപ്പോയതോടെ നിയന്ത്രണം വിട്ട ലോറി റോഡിന്‍റെ വശത്തേക്ക് മറിയുകയായിരുന്നു. എതിർ ദിശയിൽ മറ്റ് വാഹനങ്ങൾ എത്താതിരുന്നതിനാൽ കൂടുതൽ അപകടം ഒഴിവായി.
ലോറിയിൽ ഡ്രൈവർ മാത്രമാണ് ഉണ്ടായിരുന്നത്. ഇയാൾ പരിക്കേൽക്കാതെ രക്ഷപെട്ടു. ദേശീയപാതയിലെ സ്ഥിരം അപകടം നടക്കുന്ന മേഖലയാണിത്. പൊൻകുന്നം മുതൽ കൊടുങ്ങൂർ വരെ നിരവധി അപകട വളവുകളാണുള്ളത്. പൊൻകുന്നം പോലീസ് സ്ഥലത്തെത്തി മേൽനടപടികൾ സ്വീകരിച്ചു.
