ജയറാമിനെ നായകനാക്കി ലിയോ തദേവൂസ് തിരക്കഥ രചിച്ചു സംവിധാനം ചെയ്യുന്ന ലോനപ്പന്റെ മാമ്മോദീസ റിലീസിന് തയാറെടുക്കുന്നു. തൃശൂർ ജില്ലയിലെ ക്രൈസ്തവ കുടുംബപശ്ചാത്തലത്തിലൂടെ അവതരിപ്പിക്കുന്ന ഈ ചിത്രം ആ മേഖലയിലെ ഭാഷ സം സ്കാരം, ആചാരരീതികൾ എന്നിവയ്ക്ക് ഏറെ പ്രാധാന്യം നൽകുന്നതാണ്.
വാച്ച് കട നടത്തുന്ന നാൽപതു കഴിഞ്ഞ ലോനപ്പനും അവന്റെ മൂന്നു സഹോദരിമാരുമാണ് ഈ ചിത്രത്തിലെ കേന്ദ്ര കഥാപാത്രങ്ങൾ. ഇവർ നാലുപേരും അവിവാഹിതരാണ്. ഉത്തരവാദിത്വങ്ങളൊന്നുമില്ലാതെ നടന്ന ലോനപ്പന്റെ ജീവിതത്തിൽ ഒരു ഘട്ടത്തിൽ ഒരു വഴിത്തിരിവുണ്ടാകുന്നു. ഇതു നർമ മുഹൂർത്തങ്ങളിലൂടെ അവതരിപ്പിക്കുന്ന ചിത്രമാണ് ലോനപ്പന്റെ മാമ്മോദീസാ. ശാന്തി കൃഷ്ണ, നിഷാ സാരംഗ്, ഇവ പവിത്രൻ എന്നിവരാണ് ജയറാമിന്റെ സഹോദരിമാരായി അഭിനയിക്കുന്നത്.
കനിഹ, അന്നാ രേഷ്മ രാജൻ, ഇന്നസെന്റ്, ജോജു ജോർജ്, ദിലീഷ് പോത്തൻ, ഹരീഷ് കണാരൻ, നിയാസ് ബക്കർ തുടങ്ങിയവരും ചിത്രത്തിൽ അഭിനയിക്കുന്നു. സുധീർ സുരേന്ദ്രൻ ഛായാഗ്രഹണവും രഞ്ജൻ ഏബ്രഹാം എഡിറ്റിംഗും നിർവഹിക്കുന്നു. പെൻ ആൻഡ് പെൻസിൽ ക്രിയേഷൻസിന്റെ ബാനറിൽ ഷിനോയ് മാത്യു ആണ് ചിത്രം നിർമിക്കുന്നത്.